مسابقه امثال

[المتمرد]

يت في بالي هذي الفكره وما ادري اذا بتعجبكم !

الفكره هي ان كل واحد يحط مثل خليجي او بالاحرى نصف

مثل والعضو اللي يرد عليه يحاول يكمل المثل

طبعا الفكره مفيده لانها بتفيد الواحد يتعرف على

الامثال اللي كان يستخدمها اجدادنا وبعضها

لا يزال متداول في ايامنا هذي...

وكبدايه راح احط مثل وايد سهل واللي

يعرف التكمله يتفضل


(الاعور بي العميان....شو؟


والسموحه

[ريحانة قطر]

ماشاء الله عليك اخوي المتمرد فكرتك فعلا حلوه ونحن لازم نتذكر ماضي اجدادنا والي ماله اول ماله تالي بس بصراحه يعني السموحه المثل الي حطيته صعب شوي :in_love بس انا بشاركك وبحط مثل وانت عاد عليك تكمله والاخوه انشاء الله بيشاركونا


حلاة الثوب.........وشو؟؟؟؟؟

[سارونة]

حلاة الثوب رقعته منه وفيه

تسلم المتمرددد خووووووووووووش لعبه


من طق طبله ..............؟؟؟؟؟؟؟؟؟؟

[المتمرد]

ريحانة قطر مشكوره على الرد

المثل مب صعب..

الاعور بين العميان...باشه

ساروونه ما قصرتي بس لحظه خليني افكر

من طق طبله..؟؟؟؟؟والله ما اعرف


المهم مثلي هالمره يمكن شويه صعب

ميت وعينه على.....؟
يالله شدو حيلكم

ساروونه لا تنسين تكملين المثل

[سارونة]

والله مثلججج صععبب وماعرفتتهه

ورااح اكملل مثلي اليي اهوووه ؟؟


من طق طبله قاال انا قبله

[المتمرد]

هلا

تكملة المثل

ميت وعينه على الراكه

والراكه نبته تتغذى عليها الجمال(البعير)

والمثل ينضرب في الواحد اللي مثلا ما يقدر يسوي

الشي وهو لا لازم يسويه غصب ولا طيب

انشالله وصلت المعلومه

يالله المثل اللي بعده

جديم الصوف ولا.....؟

[سارونة]

جديم الصووف ولا يديد البرييسم

مثليي يقوول


طقننيي وبجا .....؟؟؟؟

[المتمرد]

طقني وبجا..سبقني واشتكا:bb

الحيييييييييييييين...

تتمنى القرعه.......؟

[دلوعة ماما]

مسابقة جميلة..


بثبتها لكم..
وكملوا..
عاد أنا صفر في الأمثال:p

[سارونة]

المتمردددد

امثاالك صعبه ماعرفته

[بنت الدار]

مرحبا المتمرد
مسابقه حلوة
بس ياترى شو الجايزة؟؟؟؟

بس لي عتب صغير على الاخوان
عنبوووووووووه نسيتوا هالمثل؟؟؟؟؟؟
انا كنت قد كتبته لكم مره

بس ماعليه بارد اكتبه وان شاء الله ماتنسونه لانه مثل اماراتي معروف

(تتمنى العورا تشوف وتتمنى القرعه تربي زلوف)

مع تحياتي

[المتمرد]

بحط مثل سهل علشان ما تقولون امثالي صعبه

كلمة تستحي منها ....؟

المثل الثاني

اللي عنده القرص....؟


يالله سارونه ...بنت الدار

شدو حيلكم

[بنت الدار]

هلا المتمرد
انا بجاوب على واحد
علشان نعطي الاخوان والاخوات فرصه يجاوبون


كلمة تستحي منها ..........بدها

وسلامتكم

انا باحط لكم مثل بعد

ما عاف عشاه إلا من .......................

.العشا هو العشاء بالفصحى عشان اساعدكم
وعاف اظن تعرفونها "ترك"
يلا اللي يجاوب له جايزة
من الاخ المتمرد طبعا

[المتمرد]

اول شي بكمل المثل اللي يقول

اللي عنده القرص يرقص

والله مشتهي قرص مدقوق

انزين..

ما عاف عشاه....؟

انا مادري بس بحاول

ما عاف عشاه الا من نساه

يمكن:)

المهم المثل الحين يقول

لو كل من يا ونجر ......؟

[همس الورد]

يعطيك الف عافيه اخوي

فعلا مسابقة حلوه

لو كل من يا ونجر ......؟

لو كل من يا ونجر ما ظل في الوادي شجر


تحياتي...

[همس الورد]

نسيت احط لكم مثل


مثلي يقول



اللي مايعرف للصقر ........



تحياتي...

[سارونة]

:p


:p

هذا سهل


ألي مايعرف للصقر يشويه :)


مثلي يقوول


يامن شراله من .........؟؟


يلا عااد هذا سهل

[همس الورد]

هم هذا سهل

يامن شراله من حلاله عله
وانا اقول

اذا بليت يافصيح ................



تحياتي...

[بنت الدار]

هههههههههه المتمرد شكلك يوعان" مب منك من القرص المدقوق"
بس لحظة بنخبر الجماعه شو القرص المدقوق
هو قرص عادي عجين وماي وملح نحطه على الضو وعقب يدقونه بالمنحاز وكان القرص تقريبا هو اكل اهلنا الاوليين ولازال طبعا

بس الاجابه غلط
يلا حاولوا

ماعاف عشاه إلا من ...............
من شو فكروا

تحياتي

[بنت الدار]

همس الورد
اول لازم تجاوبون على المثل اللي حطيته
صعب؟؟؟؟؟


بالنسبه للمثل اللي حطيته
اعتقد
اذا بليت يافصيح.........لاتصيح
صح؟

[المتمرد]

ما عاف عشاه ..الا من لوعه في حشاه:bb:bb:bb

شو رايج بنت الدار:cool:

همس الورد شوفي انا بحاول...

اذا بليت يا فصيح...فاسكت

ترى هالحل اختراع من عندي:11istling

انزين يالله هذا مثل سهل...

الطول طول نخله و......؟

شدو حيلكم

[بنت الدار]

مرحبا المتمرد
ياخي المثل وااااااااااااايد صعب
بس حاول ..........الطول طول نخله
يارب شوه؟؟
بحاول
الطول طول نخله والعقل عقل صخله

وسبحااااااااان الله كيف عرفت المثل اللي انا حاطيته؟؟؟؟؟؟

هالمره المثل اللي باحطه ماظن تعرفه "حتى وان استعنت بصديق"

المثل يقول

الحبيب ولد الحبيبه ماقدر للسيل حيله.......و.......................

والمثل له قصه حلوة ان شاء الله باخبركم بها بس اذا عرفتوا الجواب

تحياتي
بنت الدار

[سارونة]

ماعرفتتتتتتتتتت


:(

[ريحانة قطر]

ههههههههههههههههه

والله من اليوم لين بكره ما راح اعرف الاجابه صراحه صعب يلا عاد بنت الدار

حطي الجواب

وخذوا مثلي


من عيب عاب و____________

ومثل ثاني بعد


على شينه _________


انشاء يطلعون صعبين اختكم ترى مو وايد قوية في الامثال وامثالها على قدها :)

[المتمرد]

اشتغلتو علينا ويا امثالكم الصعبه

المهم انا ما بحط مثل علشان ما نضيع في الطوشه

بنت الدار ما نفع الاستعانه بصديق طلع الخط مشغول

يالله حلي المثل وقولي القصه

ريحانة قطر خليني استعين بالجمهور وبحاول ارد

افااا سارووونه شدي حيييلج

يعطيكم العافيه

بس انا مستغرب من شي

الشباب ليش ما يشاركون

[بنت الدار]

مرحبا
ههههههههه امثالي صعبه ؟!
يلا باحله لكم عشان تحطون امثالكم

الحبيب ولد الحبيبه ماقدر للسيل حيله
والعدو ولد العدوه يرني من السيل قوه
"يرني - جرني"

وسالفة المثل يطولي عماركم انه كانت عيوز "عجوز "تمشي وطاحت في السيل "لاتتخبرون كيف طاحت المهم طاحت" فيا "جا" ولد بنتها "الحبيب ولد الحبيبه مثل ماكانت تسميه" وحاول يجرها لكنه ماقدر فخلاها.........وعقب يا ولد ولدها "العد ولد العدوه مثل ماكنت تسميه "ويرها او نشعها من السيل بقوه.......يعني سبحان الله كانت تعتبر حرمه ولدها عدوه وتفضل ولد بنتها على ولد ولدها...والحق يقال كثير من حريمنا الله يهديهن يفضلن عيال بناتهن على عيال اولادهن بسب تعرفون العلاقه الابديه بين "الحماه والكنه"هههههههههه
المهم هذي قصة المثل وتكملته

اما بالنسبه لامثلة عزيزتي ريحانه قطر
عرفت واحد انا
فوق شينه قواة عينه

يلا حد يحط لنا مثل يديد
او يجاوب على مثل ريحانه الثاني

اخوي المتمرد
تتسأل في نفسك ( ليش الشباب مايشاركونك موضوعك؟؟؟؟؟)
الصراحه سؤال مهم

حد يجاوبه بالله عليكم

تحياتي
بنت الدار

[المتمرد]

بنت الدار مشكوره على المثل الحلو

ريحانة قطر ياريت تكملين المثل الثاني

وتشوفين اجابة بنت الدار صح ولا لا


المثل اللي بحطه اليوم سهل

يوم الربا ربيت...؟

[ريحانة قطر]

ههههههههههه

تصدقون عاد
*
*
*
*
*
انا ما كنت ادري انه المثل الي حطيته صعب هههههههه بالعكس كنت متوقعه بتعرفونه فورا بس الحمدلله صار مثلي صعب عشان ادوخكم شوي معاي :p
*
*
يلا جواب مثلي كان
*
*
*
*
من عيب عاب والعيب تحت الباب

والمثل الثاني صح بنت الدار

على شينه قواة عينه

وهذا مثلي لليوم تراه سهل هالمره

الطويلة قضت حاجتها و...............


تراه سهل وايد وحلو هههههههه يلا عاد حلوه بسرعه


حل مثلك امممممممم بصراحه حاسه انه مار علي بس مش فاكرة الجواب عدل بس بحاول الاستعانه بصديق

[ريحانة قطر]

:mad:
:mad:

يعني شلون وبعدين يعني
:mad:


:mad:
ترى ازعل منكم ( هههههههههههه) امزح وياكم
:bb بس ترى جذيه مش حلو وينكم وين حلول امثالكم
يلا عاد يعني مثلي تعبكم ترى :bb

بعدين
*

*

*
بحط امثال اصعب يلا عاد رجعوا واثروا المنتدى بالامثال الحلوه وبلا هالقطيعه
وماراح احل المثل خلكم فكروا فيه شوي

[المتمرد]

ريحانة قطر ...أعصابج

اسمحيلي انا انشغلت في اليومين اللي مضن

المهم انتي حلي المثل علشان نستفيد...

بنت الدار وين هالغيبه..

لا تخافين ..حل المثل اللي حطيته

يوم الربا ربيت..ويوم حايتي ما ريت

يا جماعه سارونه وين مختفيه..!!؟

مثلي اليوم يقول..

ما مات الا..؟؟

فاصل اعلاني ونعود اليكم:w00t

[المتمرد]

الظاهر ان الجماعه بعدهم رقود

يالله لا حول ولا قوه

بحل المثل..

ما مات الا بلق عينه

ريحانه مختفيه

بنت الدار الظاهر شردت يوم شافت الامثال صعبه

ساروونه....من طول الغيبات ....

بحط مثل سهل علشان تشاركون.....

والله اني طيب:)

المثل يقول..

يبغي يكحلها....

بعد قولو صعب ...!!!!!!!!!!!!!

فاصل اعلاني ونعود اليكم:w00t

[بنت الدار]

أفاااااااااااا المتمرد انا اشرد؟:(
انا والله قلت في خاطريه باعطي الاخوان فرصه لانه الامثال الاماراتيه اكيييييييييييييييييييييييييييييييييييييييييد انا اعرفها
وحتى هالمره مابجاوب بعطيهم فرصه المثل سهل
بس عقبها انا باحط مثل

تحياتي لك المتمرد

[بنت الدار]

مرحبا المتمرد
شكله المثل صعب واااااايد
انا بجاوب المثل يقول
يبغي يكحلها.......عمها


انا باحط مثل سهل يمكن تشاركونا

المثل يقول
من خاف............شو؟؟

كملوه اظني انه بسيط

تحياتي للجميع

[المتمرد]

بحاول احل المثل...

من خاف سلم

صح؟

مثلي يقول..

طلع من الطوي ....

ادري صعب:D

حاولوا

[بنت الدار]

مرحبا المتمرد
المثل صعب
وماظني اماراتي
لاني ماعرفه
بس باتوقع هههههههه

طلع من الطوي........طاح في الرشا
والرشا للاخوان الغير اماراتين هو الدلو
بس انا اتوقع ادري به غلط
بس محاوله

تحياتي لك

[المتمرد]

يعني تقريبا صح...

طلع من الطوي ..طاح في المقاله

بنت الدار ليش ما حطيتي مثل..:mad:

ولا خلصن الامثال;)

[بنت الدار]

لالا ماخلصن المتمرد

هذا مثل نبا خوان شما من قطر يجاوبون يابويه تفاعلوا معنا شويه
والمثل يقول:

كلن يهيل الملاله على .........وشو؟؟؟؟؟

تحياتي لللجميع

[ريحانة قطر]

هلالالالالا وحشتووووووني


سامحوني على القطيعه ياجماعه والله كنت تعبانه شوي وبعد الامتحانات مدوره راسي اقول ياجماعه وين اختفوا البقيه سارووووونة يلا عاد رجعي نبي امثال الكويت وانا علي امثال قطر والباقي ما شاء الله اثرونا بالامثال الاماراتيه

حل مثلي ياجماعه هو (( الطويله قضت حاجتها والقصيرة نادت جارتها))


شفتوا اشلون سهل ، بنت الدار بصراحه مثلج صعب


امممممممم وش احط لكم مثل وشوا احط لكم امممممممم



انا بحط لكم دفعات ههههههههههههه عشان تتسلون لو غبت عنكم


من سوى------

الزين زين -----------

بس كفايه اثنين


هههههه بصراحه ما اتذكر غيرهم الحين

[الشقيان]

المتمرد

أشكرك على الفكره الحلوه لان الواجب ان نحن نحافظ عليها حتى ماتندثر وتضيع وتروح من عدنا

وبالنسبه للمثل الاعور بين العميان باشا

[سارونة]

:(

سووري على الغيييبه نسييت :D

بس انشاء الله بحاوول اكملل


;)امثاالكم صعبه ماعرفته

[راعي الدوحة]

السلم عليكم اخواني واخواتي:
تحياتي للجميع
يجب علينا ان نتذكر ماضينا وماضي اجدادنا في كل امورهم الحلوه والجميله من ترابطهم الاجتماعي وحب الخير للجميع لانهم كانوا يعيشون في مركب واحد0

هذي مشاركه مني ببعض الامثال بالعربي والانجليزي:
(1) ما يأتي بسهوله يذهب بسهوله
East come easy go
(2) العبرة بالأعمال وليس بالاقوال
Actions speak louder than words
(3) الصديق وقت الضيق
Afriend in need is afrend indeed
(4) لا تلقوا بأيديكم الى التهلكه
Don t put your head in the lions mouth
(5) الاقربون اولى بالمعروف
Charity begine at home
(6) من شب على شيء شاب عليه
Al ways has been al ways will be
(7) الغايب عذره معه
The absent part is not faulty
(8) على قد لحافك مد رجلك
Cut your coat according to your cloth
(9) وفسر الماء بعد الجهد بالماء
After great effort he explained that water is water
(10) عامل الناس كما تحب ان يعاملوك
Do as you would be done


جعلنا الله ممن يستمعون القول فيتبعون أحسنه
راعي الدوحة