جولة المسؤول للتصوير!

[تايه الخطوه]

كل يوم والثاني نقرأ في الجرايد عن المدير الفلاني والا المسؤول الفلاني أنه سوى جولة تفتيشية، وكلها كم صورة في الجريدة ويرجع لمكتبه ويستمر الوضع على ما هو عليه.. ليش؟ من خلال خبرتي في طبايع المجتمع السعودي الله يخليه لنا، الجولات هذي يا إخوان ما هي عشان تحسين العمل أو رفع مستوى الخدمة، احلق نص شنبي وامشي بالشوارع بنص شنب كانهم يفكرون كذا، كل السالفة عشان يشوف مدير المدير أن المدير مدهر ويشتغل، وهالأمور أنتم عارفينها بدون ما أشرح لكم، بعدين لا صرت ذهين وتبي الفكة ضبط أمورك مع سكرتير المدير، عشان من يطلع المدير من مكتبه يدق عليك سكرتيره ويعلمك وعلى بال ما يوصلك تكون حركت من بيتكم ووصلت مكتبك، خلاص صرنا كاشفين هدف الجولات التفتيشية، ولا عاد حتى نقرأها لا شفناها بالجريدة لأننا عارفين وش المكتوب بالضبط، ولو كان هالجولات التفتيشية يقوم فيها المسؤول لوجه الله تعالى كان ما وصل خبرها للصحافة، مو تقولون يهمكم سمعة الجهة اللي تعملون فيها وتعطيكم رواتب آخر الشهر وغيركم مو لاقي هالراتب وهو أطلق منكم الفين مرة، أجل اشتغلوا لوجه الله ولا تطلعون أخبار انكم سويتوا جولات تفتيشية، حتى هالموظف المسكين اللي تصيدونه مفرك أو مقصر بشغلة، مسكين ما له ذنب، كل ذنبه انه ما ضبط حاله مع سكرتيركم!