تايه الخطوه
22-09-10, 08:10 AM
بعض الناس ماعنده مشكلة من السلف، يمشي ويتسلف، لو قابل واحد بمحطة بنزين وسولف معاه خمس دقايق طلب منه سلف يرده بكره، وهو حاط براسه انه ماراح يرد ولاقرش من اللي تسلفه، وسبحان الله جميع هواة التسلف عندهم نفس الخطة والذهانات والمراوغات كنهم دارسينها دراسه ولها منهج يطبق، وتستغرب انهم يقولون نفس الكلام للي يجيهم يبي فلوسه اللي سلفهم اياهم، بالبداية يقعدون يحالفون ان هالحين مامعهم شي وان جايتهم فلوس بعد كم يوم وازهل الموضوع اول من راح يسددونه أنت، وعاد انت لانك مو خبير بمدمنين التسليف ترجع لبيتكم تدربي دمجتك مصدق ان فلوسك راح ترجع لك، ماتدري ان ادمان التسلف من خلق الله مثل ادمان بعض الاغنياء اللي لاراحوا السوق يزرفون ولاعة دخان والا مصاصة بنص والا حتى مفك صلصل، ماهي حاجة بس حكة بالمخ لازم يسوون كذا، بعدين تتصل عليهم تبي قروشك على الوعد ماعاد يردون على الاتصال، ويمكن بعضهم يصك الخط بوجهك، لاتستغرب لأن هذه المرحلة الثانية من خطة (طفش ابو سلف اللي ماعاد ينفع به حلف)، واذا صرت سبهه ولافهمت تصرفهم معاك، يعطونك اياها على بلاطه (ياخي انت ماتفهم، ماني مسدد، رح اشتكني)، عاد لاقال رح اشتكني يكون رماك ورمى معرفتك بسلة المهملات وراح يدور على زباين ثانيين.