تايه الخطوه
28-07-10, 04:25 AM
بصراحة الواحد بدأ يحس ان سالفة الحر اللي تصفقنا هالايام تحتاج ان الواحد يحاول قبل لا يروح لأي مكان يخلي مشواره بعد المغرب، لان الحر ما ينفع فيه لا مكيف سيارة ولا مكيف مكتب، ما توصل مكتبك الا وانت يا دوب تمسك نفسك، ودك تقول لرفيقك: كاني طحت على وجهي ترى ما فيني غير ضربة شمس، صار الواحد يهوجس كل ما قرا ان فيه كم واحد ماتوا من ضربة الشمس، المشكلة اننا ما نعرف وش اعراض ضربة الشمس عشان الواحد يقدر يتلاحق نفسه قبل لا يلاقي نفسه في عداد المفقودين، تطالع لنفسك وانت تسوق السيارة ومشغل المكيف وراسك يفور كنه ابريق شاي وتقز عيونك بالمراية والا هم حمر، ودك تلبق عند اقرب صيدلية، ودك تفتح القزاز وتنشد راعي السيارة اللي جنبك: تكفى يالاخ وش اعراض ضربة الشمس؟ تحس ان احمرار العين اكيد انها من الاعراض ما تبي له مدرس رياضيات، الشمس ترسل الحرارة لجمجمتك، جمجمتك تقوم تغلي، وعشان عيونك مركبه في جمجمتك يصيرون حمر (امحق شرح)، يقولون انه الحر ما جانا من مية وخمسين سنة راحت، كان ودنا من وزارة الصحة يعطونا بعض التعليمات وش لون سالفة ضربة الشمس، وش سنعها، وشلون هي قايله، وشلون الواحد لا حس فيها يفك عمره لا يروح غلطة!