«منشار» الصحة!

[تايه الخطوه]

مدري انتم زيي والا بس انا اللي ماخذ اقرب مخرج من السريع لحالي، زي اللي قاعد على طعس يغني لحاله ولا حد حوله، اقصد انتم مثلي قليل تروحون للطبيب وتلبقون عند اقرب صيدلية تخمون علاجاتكم والحمد لله رب العالمين، من تخرج ولد عمي صيدلي قبل خمس طعش سنة وانا ما غير ازهم عليه ويجي العلاج مسج فوري ولا زحمة مستشفيات ولا اشعة ولا خرابيط، ليش؟ لان المستشفيات عندنا يمكن لو عالجت نفسك عن طريق البحث عن قوقل اشوى لك من مراجعهم وبهدلتهم لك، لا، ويمكن بالأخير يطلعون مخطين خطأ طبي ثم تروح فيها، الله لا يضر مسلم، قريت قبل كم يوم سالفة صيدلي مكتشف علاج للغرغرينا، ويصايح على وزارة الصحة يا ناس حرام عليكم تبترون اعضاء المسلمين، السالفة ما تسوى انك تبطح كل من عنده غرغرينا ثم تشغل منشارك، طبعا هالصيدلي الله يوفقه تعب وهو يطارد ورى وزارة الصحة يبي احد يعطيه وجه بس مو لاقي، لان وزارة الصحة ناس هاي كلاس، ما يبون ينقص برستيجهم قدام العالم انهم يعترفون بصيدلي جايب طريقة لعلاج مرض خطير زي هذا، كن عندهم حساسية من كلمة اعشاب، من اول ما يسمعون بتركيبة الدواء اسم اعشاب على طول يسوون حالهم ما يسمعون السالفة، ويخلونك تكره اليوم اللي فكرت فيه انك تتعب وتدرس وتحاول تنفع المسلمين، وش فيها الاعشاب يا وزارة الصحة، ترى 90 % من الادوية اللي تجيبونها من برا مكونة من الاعشاب بس مزبرقة عشان تعجبكم!