انحش عن الساطور.

[تايه الخطوه]

الناس عندها توقع ان الاطباء عندنا أكثرهم لابسين هالبالطو الابيض علشان يكبرون ارصدتهم بس.وماهنا احد واثق أن الطبيب حريص على صحه الانسان اللي يعالجه.لوتجيهم عندك زكمه شالو لك البنكرياس .مايمديك تكمل شكواك للطبيب الا قال لك لازم عمليه.صار الكثير من الاطباء يفحص عليك وهو منشغل باله يفكر كم عمليه راح يسوي هالاسبوع.مطامر الاطباء ورى العمليات خلى اكثر الناس تنحاش للطب الشعبي.كله كوم والعمليات القيصريه كوم.شغالين فتح في بطون الحريم ولاحسيب ولارقيب.اللي نعرفه وحنا مادرسنا طب ان العمليه مايسويها الطبيب.الا اذا ماكان فيه مجال عنها.بالذات العمليه القيصريه محتاجه مراجعه من وزاره الصحه وضبطها قبل مايطلع أويتسرب تقرير سري من واحده من المستشفيات يكشف شي مايترقع.سمعه الطبيب السعودي محتاجه احد ذهين يفطن لها ويحاول أنه يعالج الوضع بسرعه.مافيه بطن مواطن سعودي أو مواطنه مامر عليها ساطور طبيب الا شوي ناس بعضهم للحين ما انمرض_من فضل الله.وبعضهم هج بعمره برى وبعضهم راح للطب الشعبي.عشانه يوم قارن بين الساطور والاعشاب أختار انه يموت بالاعشاب أحسن له,لان الساطور مايعطيك فرصه تعرف فيها انك راح تموت.من يخدرونك أنت وحظك.لكن الاعشاب ياحليلها.تعطيك فرصه انك تنسدح على فراش بيتكم وتنادي على الناس اللي ودك تشوفهم قبل لاتموت وتسلمها لله وأنت مالي عينك من شوفه اهلك......الله لايقاس عليناوعليكم بشر ..